नुवाकोटको थाङसिङ–१ का प्रताप लामाको दायाँ हातको पञ्जा छैन । त्यसैले उहाँ त्यो हात प्रायः पाइन्टको गोजीमा हाल्नुहुन्छ, नभए कपडाले छोपेर मात्रै बाहिरफेर घुम्न निस्किनुहुन्छ ।
कम्पनीको काम गर्दा गर्दै एक वर्ष अघि उहाँको हात काठ चिर्ने मेसिनले च्यापेको थियो । घटना सुनाउँदै प्रतापले भन्नुभयो ‘मेसिनले मेरो हातको पञ्जा पुरै छिनाएको त थिएन, तर डाक्टरले हात जोड्न नसकिने भन्दै काटिदिए ।’
प्रतापका साथीका अनुसार दुर्घटनामा परेपछि बेहोस भएका उहाँलाई कम्पनीका प्रतिनिधिले तत्कालै अस्पताल लगे । तर अस्पतालमा उनीहरु सोधखोज गर्न भने गएनन् । अस्पतालमा पनि प्रतापले कष्टकर दिन बिताउनुपर्यो । गरिखाने हात मेसिनले च्यापेर काट्नुको पीडा त छँदैछ, परिवार पाल्ने चिन्ता पनि थपिएको छ प्रतापलाई । कम्पनीले उपचार खर्च बेहोरे पनि बिमा बापतको रकम भने पाउनुभएको छैन । बिमा बापत थोरैतिनो रकम हात परे नेपाल फर्कने सोचमा हुनुहुन्छ उहाँ ।
मलेसियाको सेलांगर राज्यको सिमोनियामा रहेको सिन यिप फर्निचरमा काम गर्ने प्रतापले मात्रै होइन, काम गर्दा गर्दै हात गुमाका, औला गुमाएका, हात भाच्चिएर स्टिल लगाएर भरथेग गरेर बसेका अरु नेपाली पनि छन् ।
५ वर्षदेखि त्यही कम्पनीमा कार्यरत भोला प्रसाद रजकको पनि काम गर्दा गर्दै हात भाच्चिएको थियो । काठको धुलो सफा गर्ने क्रममा मेसिनमा हात पर्दा उहाँको दाहिले हात भाच्चिएको हो । तीन वर्षअघि दुर्घटना भएपनि उहाँले बिमा बापतको रकम पाउनुभएको छैन । अहिले,कम्पनीले भोलालाई सरसफाई गर्ने काम दिएको छ ।
नवलपरासीका धर्मेन्द्र गुप्ताको पनि कामकै क्रममा दायाँ हातको ४ वटा औंला गुमेको छ । काठ चिर्ने मेसिनले २६ महिना अघि गुप्ताको औंला छिनाएको हो । उहाँलार्य कम्पनीले सुरक्षाको गार्डको काम दिएको छ । भोला र धर्मेन्द्रले पनि बिमा बापतको पैसा पाएका छैनन् । बिमाको पैसा पाए उनीहरु पनि घर फर्कने सोचमा छन् ।
एउटै होस्टलमा ३२ जना, पानी पर्दा बोराले छानो टाल्नुपर्ने
सिङ यिप कम्पनीमा झण्डै ४ सय नेपाली कार्यरत छन् । कम्पनीले हरेक महिना विभिन्न शिर्षकमा तलब काट्ने गरेको यहाँ कार्यरत नेपालीले गुनासो गरेका छन् । एउटै होष्टलमा ३२ जना बस्न बाध्य भएको पीडितको गुनासो छ । कम्पनीको हाताभीत्र जस्तापाताले बारेर बनाइएको होस्टलमा उनीहरु बसिरहेका छन् । लस्करै काठका दुई तले खाट राखिएका छन् । एक जना मात्रै हिँड्न मिल्ने प्यासेज छ । पाँच फिटमाथि जस्तापाताको छानो छ । मज्जाले उभिन पनि मिल्दैन । ठाँउ ठाँउमा बोराले टालिएको छ । पानी परेका बेला पानी चुहिने भएकोले ठाउँ ठाउँमा बोरा र कार्टनले टालेको सप्तरीका सिद्धेश्वर साहले बताउनुभयो |
0 comments:
Speak up your mind
Tell us what you're thinking... !